सुविन्द्र श्रेष्ठ
टोखा टाइम्स, २८ साउन । थाइल्यान्डको पटायामा सम्पन्न भएको प्रतिष्ठित ‘आठौँ हिरोज अन्तर्राष्ट्रिय तेक्वान्दो च्याम्पियनसिप-२०२५’ मा नेपालले शानदार प्रदर्शन गरेको छ। यस प्रतियोगितामा नेपालको प्रतिनिधित्व गर्ने टोखा र तार्केश्वरका २२ मध्य १८ प्रतिभाशाली खेलाडीले सफलता प्राप्त गरेका छन् ।
प्रतियोगिताको विविध विधामा पाँच स्वर्ण, तीन रजत र दस कांस्य पदक गरि कुल १८ पदक हात पारेका छन् । कुमार लवट, सुसन्ध्या खड्का, अबिन श्रेष्ठ, मुगा माया पाखरिन, रोनाशा थापाले स्वर्ण पदक हात परेका थिए । त्यस्तै गरि, अनिशा तामाङ, समीर भुजेल र भिक्सन गुरुङले रजत पदक हात पारे । भने, सर्वोच्च लामा, संयोग खड्का, सरोज मुक्तान, आर्यन फेरि, आरुषि फेरि, स्वीटा पुजारी, आकृति गुरुङ, योजना गौली, आर्यन तामाङ र छोई डोल्मा तामाङले कांस्य पदक हात पारे ।
मुख्य प्रशिक्षकमा सानु बाबु महर्जन, प्रशिक्षकमा गौरव राजक र प्रबन्धकमा साजन श्रेष्ठ रहेको उक्त टोलीलाई बिहिबार दिउँसो लायन्स क्लव अफ टोखा काठमाडौंका डिष्ट्रिक्ट क्लोथ बैक को-चियरपर्सन शन्तलाल श्रेष्ठ, जोन चियरपर्सन लायन सानुबाबु श्रेष्ठको टोलिले त्रिभुवन अन्तर्राष्ट्रिय विमानस्थलमा पुगि विशेष सम्मान सहित स्वागत गरि बधाई दिएको थियो।
मुख्य प्रशिक्षकमा सानु बाबु महर्जनले भने “यस्ता अन्तर्राष्ट्रिय प्रतियोगितामा नेपाली खेलाडीहरूको सफलताले भविष्यमा अन्य युवा खेलाडीहरूलाई पनि तेक्वान्दो खेलमा लाग्न प्रोत्साहन मिल्नेछ।”
तुख्य तेक्वान्दो डोजाङका प्रशिक्षक तथा स्वर्ण पदक विजेता कुमार लवटले आफ्नै आर्थिक लगानीबाट खेलाडीहरूले नेपालको प्रतिनिधित्व गर्दै उक्त प्रतियोगितामा सहभागिता जनाएको बताउदै उनले भने “ यो जीतले नेपालको राष्ट्रिय गौरव बढाउनुका साथै अन्तर्राष्ट्रिय मञ्चमा नेपाली तेक्वान्दोको पहिचानलाई थप उचाइमा पुर्ययाएको छ।”
लायन्स क्लव अफ टोखा काठमाडौंका जोन चियरपर्सन लायन सानुबाबु श्रेष्ठले विजयी खेलाडीहरूलाई बधाई दिंदै राष्ट्रको नाम राख्ने खेलाडीहरूको सम्मान र तिनको मनोबल बढाउन लायन्स क्लव अफ टोखा काठमाडौंले सक्दो सहयोग गर्ने बताए ।
उनले देशका लागि समर्पित भएर खेल्ने खेलाडीहरूको दैनिक जीविकोपार्जन गर्न केन्द्रीय र स्थानीय सरकारको आर्थिक सहयोग अपरिहार्य रहेको समेत बताए ।
प्रतियोगितामा २७ राष्ट्रका २ हजार बढी खेलाडीहरूको सहभागिता रहेको उक्त प्रतियोगितामा खेलाडीहरूले आफ्नै खर्चमा भाग लिन गएका हुन ।
