• टोखा नगरपालिका ६ वडा कार्यालयको भवन निर्माण सम्पन्न

    टोखा (टोखा टाइम्स) । टोखा नगरपालिकाका नगरप्रमुख प्रकाश अधिकारीले टोखा नगरपालिका वडा नं. ६ हात्ती चोकस्थित वडा कार्यालयको नवनिर्मित भवनको उद्घाटन गरेका छन् । कार्यक्रमका प्रमुख अतिथि माननिय सांसद प्रदिप पौडेलको उपस्थितिमा नगरप्रमुख अधिकारीले बुधबार उक्त नवनिर्मित भवनको उद्घाटन गरेका हुन् ।

    उद्घाटन कार्यक्रममा बोल्दै नगर प्रमुख अधिकारीले निवर्तमान अध्यक्ष  महेश्वर के.सि. जनप्रतिनिधि, कर्मचारी भवन निर्माणका लागि सहयोग गर्ने वडाबासिहरु लगायत सम्पुर्णलाई धन्यबाद दिँदै  सेवाग्राहीले सहज रुपमा सेवा प्राप्त गर्ने र भवनको पूर्ण सदुपयोग हुनेमा विश्वास व्यक्त गरे । “जनप्रतिनिधि भनेका जनताका सेवक हुन्,” उनले भने, “टोखा नगरपालिकाका जनप्रतिनिधि जनताकेन्द्रित भई समर्पित भावले काम गर्दै आइरहेका छन् । जनताको आवश्यकतामा साथ दिन जनप्रतिनिधि हरदम तयार छन् ।”

    जनप्रतिनिधि, वडाबासी, कर्मचारीको मेहेनतले टोखा नगरपालिकाको ११ वडाहरु मध्य ६ वडा पुर्वाधार क्षेत्रमा ९० प्रतिशत विकास गर्न सफल भएको बताउँदै नगरप्रमुख अधिकारीले सबैलाई बधाई दिए ।

    वडा कार्यालयको सफलता तिनले आम नागरिकलाई कसरी सेवा दिन्छ भन्नेमा भर पर्ने कार्यक्रमका प्रमुख अतिथि  काठमाडौँ – ५ का माननिय संघिय सांसद प्रदिप पौडेलले बताए । उनले आम नागरिकलाई सहज सेवा दिनका लागि नगरपालिकाले प्रविधिसँग जोडिएर आफ्ना सेवाहरु डिजिटलाइजमा लान आवश्यक रहेको सुझाएका थिए ।

    टोखा नगरपालिकाले आम नगरबासीहरुलाई सुशासन सहितको सेवा दिँदै आइरहेको टोखा नगरपालिकाका उपप्रमुख मुरारी तामाङले बताए । उनले भने-“कसैसँग राजनीतिक आग्रह पुर्वाग्रह निर्वाचनको समयमा मात्र रहन्छ, जितेर सकेपछि त्यस्ता भावना त्यागि जनतामा समर्पित भएर जनप्रतिनिधि र कर्मचारी सेवामा लाग्नु पर्छ ।” त्यस्तै, कार्यक्रममा बोल्दै प्रशासकिय प्रमुख अधिकृत शेरबहादुर बि.सीले कार्यलय भवनमा बसेर कानुन सम्मत मुस्कान सहितको सेवा दिन कर्मचारीहरुलाई निर्देशन दिए ।

    आफ्नै वडा भवनबाट सेवा दिन पाउँदा निकै खुशि भएको वडाध्यक्ष शान्ता पौडेलले कार्यक्रममा बताइन् । वडाध्यक्ष पौडेलले वडा कार्यालय भवन निर्माणमा प्रत्यक्ष अप्रत्यक्ष सहयोगी भूमिका खेल्नेप्रति धन्यवाद ज्ञापन गरिन् । उनले वडा र जनप्रतिनिधि प्रति माया र सद्भावको लागि सहयोगिहरु प्रति आरभार ब्यक्त गरिन् । ६ वडालाई २०८१ मा बालमैत्री वडाको घोषणा गर्ने तयारी भैरहेको अध्यक्ष पौडेलले बताइन् ।  हाल बालबालिकाहरुको तथ्याङ्क संकल कार्य भैरहेको समेत उनले बताइन् ।

    वडा कार्यालयको नवनिर्मित ३ तल्ले भवन २ करोड ५७ लाख लागतमा निर्माण सम्पन्न भएको वडासदस्य चन्द्र श्रेष्ठ बताए । उक्त भवनको ग्राउण्ड फ्लोरमा आधारभूत स्वास्थ्य केन्द्र, दोस्रो तल्लामा वडा कार्यालय र तेस्रो तल्लामा सभाकक्ष रहेको समेत उनले जानकारी दिए ।

    वडा सचिव सरिता तिवारीले सञ्चालन गरेको कार्यक्रममा निवर्तमान अध्यक्ष मेश्वर के.सि., नगरपालिकाका १० वटै वडाका वडाध्यक्ष,  कार्यपालिका सदस्य,  आधारभूत स्वास्थ्य केन्द्रका स्वास्थ्य स्वयम सेविका, विभिन्न राजनीतिक दल, संघसंस्थाका प्रतिनिधि तथा वडाको कर्मचारीहरु लगायतको उपस्थिति रहेका थिए ।

    Facebook Comments Box