सुविन्द्र श्रेष्ठ
टोखा टाइम्स, २२ असोज । देशको पछिल्लो घटनाक्रमले देशैभर सिर्जित भय र त्राससंगै समाजमा शान्तिसुरक्षा कमजोर बन्दै गएको परिप्रेक्षमा टोखा नगरपालिकाले नगरक्षेत्र भित्र शान्तिसुरक्षा कार्यम गर्न आज सर्वपक्षीय छलफलको आयोजना गरेको छ ।
टोखा नगरपालिकाको सभाहलमा नगरप्रमुख प्रकाश अधिकारीको संयोजकत्वमा नगरक्षेत्रभित्रको शान्तिसुरक्षाका सम्वन्धमा सर्वपक्षीय छलफल आयोजना गरिएको उक्त सर्वपक्षीय छलफलमा टोखा नगरपालिकाका जनप्रतिनिधिहरु, प्रहरी वृत्त, महाराजगञ्जका प्रमुख, टोखा नगरपालिकाका पूर्वजनप्रतिनिधिहरु, नगरस्तरीय राजनैतिक दलका प्रमुख एवं प्रतिनिधिहरु, क्लब, संघसंस्थाका प्रतिनिधि एवं सरोकारवालाहरुको उपस्थिति रहेको थियो ।
उक्त बैठकबाट निर्णय भएका ६ बुँदे निर्णयहरू
१. आ-आफ्नो टोल तथा टोलबासीको जिउधनको सुरक्षा, सार्वजनिक सम्पतिको संरक्षणको लागि नेपाल प्रहरीसँगको समन्वय र सहकार्यमा काम गर्ने गरी क्रियाशिल हुन हरेक टोलमा नागरिक सुरक्षा समूह गठन गर्न वडा कार्यालय मार्फत टोलबासीहरुलाई अनुरोध गर्ने । सोको समन्वय वडा कार्यालयले गर्ने ।
२. टोखा नगरपालिका भित्रका प्रत्येक घरधनीहरुले आफ्नो घरमा बहालमा वस्ने व्यक्तिहरुको परिचय खुल्ने कागजात संकलन गर्ने एवं बहालमा बस्ने व्यक्तिले कुनै शंकास्पद गतिविधि गरिरहेको देखिएमा नजिकको सुरक्षा निकाय एवं नागरिक सुरक्षा संयन्त्रलाई जानकारी गराउने ।
३. स्थिति सामान्य नहुन्जेल अत्यावश्यक अवस्थामा वाहेक राती ९ बजे पछि घर बाहिर ननिस्किन र सम्पूर्ण व्यापार व्यवसाय (यात्रुहरुको वास प्रयोजनको लागि वाहेक) राती ९ बजे पछि बन्द गर्न सम्पूर्ण नगरवासी एवं व्यवसायीहरुलाई अनुरोध गर्ने ।
४. टोखा नगरपालिका क्षेत्रभित्र साविकदेखि स्थापना भएका प्रहरी कार्यालयहरु पूर्ववत अवस्थामा संचालन गर्न गराउन नेपाल सरकारसँग अनुरोध गर्ने ।
५. नगरपालिका क्षेत्रभित्र हाल चालू अवस्थामा नरहेका सडक बत्ती, सिसिक्यामेरा लगायतका सुरक्षासँग सम्बन्धित संरचनाहरु मर्मत संभार गरी संचालनमा ल्याउने ।
६. सुरक्षामा परिचालन हुने सम्पूर्ण संयन्त्रलाई जोड्ने गरी भाईवर ग्रुप सिर्जना गरी प्रयोगमा ल्याउने ।
