सुविन्द्र श्रेष्ठ
टोखा टाइम्स, मंसिर ९ । टोखामा नयाँ फुटसल सञ्चालनमा आएको छ । टोखा नगरपालिका-२ भिल्ली (पञ्चटार) मा ए एण्ड ए रिक्रियशन सेन्टर प्रा.लि.ले आजबाट विधिवत् रुपमा फुटसल सञ्चालनमा ल्याएको हो ।
फुटबलप्रति अत्यन्तै आकर्षण रहेको यस ठाउँमा बजार बाक्लिँदै गएपछि खेलमैदान अभावलाई मध्यनजर गरी फुटसल मैदान तयार गरिएको ए एण्ड ए रिक्रियशन सेन्टर प्रा.लि.का प्रवन्धक तथा सञ्चालक अमित डंगोलले जानकारी दिए । उक्त मैदानमा सेभेन ए साइडको एक र पाँच ए साइडको दुई खेल एकैसाथ खेल्न मिल्नेछ ।
“टोखाका युवा तथा बालबालिकामा फुटबलप्रति निकै मोह छ, तर ठाउँ अभावका कारण सबैले खेल्ने इच्छा हुँदाहुँदै पनि खेल्न पाउनुभएको छैन”, उनले भने, “त्यही अभावलाई पूरा गराउन फुटसल सञ्चालनमा ल्याएको हो ।”
पाँच ए साइडमा दुई टोली गरी दश जना खेल्न मिल्ने र सेभेन ए साइडको १४ जना खेल्न मिल्ने फुटसल बिहान, दिउँसो र बेलुका तीन समयमा खेल्न पाईन्छ । प्रति खेल पाँच ए साइडमा १४ सय र सेभेन ए साइडमा २८ सय शुल्क निर्धारण गरिएको छ । फुटसलको शुभारम्भको अवसरमा दुई- तीन महिनासम्म प्रति खेलमा १२ सय र २४ सय शुल्क लाग्ने छ । खेल्न चाहनेका लागि बुधबारबाट बुकिङ खुला गरिने सञ्चालक अमित डंगोलले जानकारी दिए । उनका अनुसार बल, खानेपानी र प्राथमिक उपचारका सामग्री फुटसलमै उपलब्ध हुनेछ ।
यस ठाउँलाई फुटसलको ट्रेनिङ सेन्टर बनाउने लक्ष्य राखिएको छ । खेलकूदमा आकर्षण बढाउन र बालबालिकालाई सानैदेखि फुटबलमा दक्ष बनाउने उद्देश्यसहित निकट भविष्यमा ट्रेनिङ सेन्टर पनि स्थापना गरिनेछ । साथै सोही ठाउँमा क्याफेसमेत सञ्चालन गरिएको छ ।
आजबाट सञ्चालनमा आएको उक्त फुटसल खेलमैदानको बुद्ध भूमी महाविहार टोखाका भन्तेहरुले बौद्ध धर्मानुन्सार विधिवत रुपमा पूजापाठ गरी उद्घाटन गरिएको थियो ।
