सुविन्द्र श्रेष्ठ
टोखा टाइम्स, कात्तिक २, २०८२ आइतबार । नेपाल संवत् ११४६ न्हूदँ हनेगु लागिं गठित नेपाल संवत् न्हूदँ राष्ट्रिय समारोह समितिया नायः पदय् नेपालभाषाया च्वमि लिसें भाषा आन्दोलनया न्ह्यलुवा प्रेमहिरा तुलाधरयात ल्यःगु दु । शुक्रवाः च्वंगु न्हूदँ समारोह समितिया मुँज्यां वय्कःयात नायः ल्यःगु खः । लिसें मुँज्यां तुलाधरया नेतृत्वय् ५१ म्ह दुजः दुगु न्हूदँ समारोह समिति ११४६ नं नीस्वंगु दु ।
न्हूदँ समारोह समिति ११४५ या नायः राजेन्द्र श्रेष्ठं मुँज्याय् वय्कःया नां प्रस्तावित यानादीगु खःसा मुँज्यां उकियात अनुमोदन याःगु खः । न्हूदँ समारोह समिति लिसें न्हूदँ संरक्षण समाजपाखें थीथी नेवाः न्ह्यलुवापिंलिसे सहलह यानाः प्रेमहिरा तुलाधरया नां प्रस्तावित याःगु खः ।
शुक्रवाः च्वंगु न्हूदँ समारोह समितिया मुँज्याय् ने.सं. ११४५ या नायः राजेन्द्र श्रेष्ठं थुगु दँय् जूगु न्हूदँ सम्बन्धी थीथी ज्याझ्वःया प्रतिवेदन न्ह्यब्वयादीगु खःसा समितिया दुजः मचाराजा महर्जनं आर्थिक प्रतिवेदन न्ह्यब्वयादीगु खः ।
अथे हे न्हूदँ संरक्षण समाजया नायः प्रा.डा. नरेशमान वज्राचार्यं न्हूम्ह नायः ल्यःगु प्रक्रियाबारे कनादीगु खःसा नेवाः देय् दबूया नायः पवित्र वज्राचार्यं न्हूदँ समारोह समितिया न्हूम्ह नायःलिसें सकलें दुजःपिंत भिंतुना देछानादीगु खः । न्हूम्ह नायः प्रेमहिरा तुलाधरं थःत नायः ल्यःगु खँय् सुभाय् देछासें थम्हं सकलें न्ह्यलुवापिनि सल्लाह कयाः ज्याझ्वःत याना वने धयादिल ।
समितिया न्हापांगु मुँज्या शनिवाः च्वनीगु ग्वसाः दु । मुँज्यां थुगुसी न्हूदँया लसताय् जुइगु थीथी ज्याझ्वःबारे सहलह याइगु खँ समितिं धाःगु दु ।
