सुविन्द्र श्रेष्ठ
टोखा टाइम्स, काठमाडौँ । नेपाली राष्ट्रिय महिला क्रिकेट टोली हङ्कङमा आयोजना हुने चार देश सम्मिलित महिला टि ट्वान्टी शृङ्खला खेल्न आइतबार त्यसतर्फ प्रस्थान गरेको छ ।
उक्त शृङ्खला यही कात्तिक २९ देखि मङ्सिर ३ गतेसम्म सञ्चालन हुने विभिन्न चार टोलीले प्रतिस्पर्धा गर्नेछन् ।जसमा आयोजक हङ्कङसहित नेपाल, ताञ्जेनिया र जापान छन् ।
शृङ्खलाको पहिलो खेलमा नेपालले यही कात्तिक २९ गते भाइटिकाको दिन ताञ्जेनियासँग खेल्नेछ । त्यसैगरी नेपालले कात्तिक ३० मा आयोजक हङ्कङसँग खेल्नेछ भने आगामी मङ्सिर २ गते जापानसँग खेल्नेछ । शीर्ष दुई टोलीले उपाधिका लागि मङ्सिर ३ गते खेल्नेछन् । त्यस्तै तेस्रो स्थानको भिडन्त पनि सोही दिन हुनेछ । उक्त शृङ्खलाका सबै खेल हङ्कङ क्रिकेट क्लबको मैदानमा हुनेछ ।
नेपाली टोलीमा कप्तान इन्दु वर्मासहित उपकप्तान विन्दु रावल, रुविना क्षेत्री, सीता रानामगर, खुशी डङ्गोल, सोमु विष्ट, सङ्गीता राई, कञ्चन श्रेष्ठ, सोनी पाख्रिन, पुजा महतो, रोमा थापा, काजोल श्रेष्ठ, सम्झना खड्का र रुवि पोदार छन् ।
